Кондак 1
Избранную и венчанную деву мученицу, невесту Христову Екатерину, похвальными песньми воспоим, яко преславную мучителя победительницу и премудрую философов наставницу: ты же, великомученице Екатерино, имущи дерзновение ко Господу, приклонися милостивне к благопотребным прошениям зовущих ти:
Радуйся, Екатерино, невесто Христова премудрая.

Икос 1
Ангелом равную чистоту имущи, святая дево Екатерино, с ангелы Божественнаго озарения сподобилася еси, с ними же воспевающи Трисвятую песнь, услыши нас, поющих тебе на земли сия:
Радуйся, честное святыни жилище;
Pадуйся, чудесное знамение сбывшагося на тебе Божия Промысла.
Радуйся, благоволения Отча сосуде;
Pадуйся, страданий Христовых исполнение.
Радуйся, чистое Духа Святаго обиталище;
Pадуйся, светом благочестивыя веры просветившаяся.
Радуйся, святою купелию отрожденная;
Pадуйся, измывшая ризы своя в Крови Агнчей на земли.
Радуйся, ликующая со священными девами на Небеси;
Pадуйся, Екатерино, невесто Христова премудрая.

Кондак 2
Видящи Екатерина себе видения сподобльшуюся, тече к святому старцу, икону ей Богоматере прежде того вручившему, и поведа ему, како отвращаше лице Свое ей явивыйся с Пречистою Своею Материею Христос, како безумну и нищу и худородную нарек, дондеже не оставит идольскаго нечестия. Преподобный же, слышав сия, настави ю в таинствах веры и крести ю. Она же во обновлении духа благодарно пояше Богу: Аллилуиа.

Икос 2
Разум благий, благородство истинное, богатство негиблющее стяжавши в духовном отрождении святая Екатерина достойна явися Небеснаго Жениха Христа, Иже, паки явився ей, возлюби ю и дарованным перстнем в невесту Себе обручи. Она же, познавши такое к ней благоволение Божие, тако уязвися любовию Его, яко не мудрствоваше более о земных вещах, но о Возлюбленном своем непрестанно мысляше. Таковой благодати сподобльшаяся слыши от нас:
Радуйся, зловоние мирское возненавидевшая;
Pадуйся, в воню мира Христова текущая.
Радуйся, добрая любительнице Жениха Безсмертнаго;
Pадуйся, сокровище благоволения Вышняго.
Радуйся, деннице пресветлая;
Pадуйся, луна совершенная.
Радуйся, маслина, в дому Божии насажденная;
Pадуйся, кедр в Ливане высокорасленный.
Радуйся, Екатерино, невесто Христова премудрая.

Кондак 3
Сила Вышняго даде тогда святей Екатерине дерзновение, еже нечествующаго царя Максимина о принесении идолом жертв обличити небоязненно, и той пребысть безгласен на мног час, не могий противитися ея глаголам. Она же, благодарящи Бога, воспеваше: Аллилуиа.

Икос 3
Имущи святая Екатерина свыше данную ей премудрость, егда нечестивый царь, постави пред собою, вопрошаше ю о роде ея и сане, она исповеда себе быти дщерь царскую, филосовския и риторския науки добре изучившую, паче же Христову невесту себе наименова, в явное отвержение идольскаго служения.
Радуйся, убо, Екатерино преславная;
Pадуйся, царское священие.
Радуйся, пчело, дыма идольскаго отлетевшая;
Pадуйся, голубице, златы крила имущая.
Радуйся, кадило Христова благоухания;
Pадуйся, Екатерино, невесто Христова премудрая.

Кондак 4
Бурею ярости вознеистовився царь на святую деву, рече к ней: «Не глаголи зле о бозех наших». Святая же Екатерина отвеща: «Аще восхощеши отрясти мрак прелести уразумееши богов твоих худость и познаеши истиннаго Бога, Егоже имя токмо глаголемое, или крест, изобразуемый на воздусе, прогоняет боги твоя и погубляет. И аще повелиши, явлю тебе истину, поющи Богу: Аллилуиа».

Икос 4
Слышав нечестивый царь свободный и мудрый ответ твой о вере Христовой, убоявся, да не будет побежден от тебе, собра от пределов державы своея мудрецов, числом пятдесят, на прение. Ты же, архангелом Михаилом утвержденная и о победе уверованная, возрадовалася еси вступити в прение с ними. Приими убо, дево, от нас похвалу сию:
Радуйся, изъявительнице ума Христова;
Pадуйся, херувимское стяжавшая Богопознание.
Радуйся, серафимскою воспаленная к Богу любовию;
Pадуйся, мудрых мудрейшая.
Радуйся, духовный меч на неверие изострившая;
Pадуйся, нечестия прогонительнице.
Радуйся, верных наставнице;
Pадуйся, Екатерино, невесто Христова премудрая.

Кондак 5
Боготечной звезде была еси подобна, Екатерино, препревши пятдесят витий и наставивши их на путь христианский, ведущий к праведному Солнцу, от Девы возсиявшему Христу Богу, своими мудрыми глаголы, иже и осуждени бывше за Христа на сожжение и напутствовани молитвою твоею, с радостию идоша в огнь, поюще: Аллилуиа.

Икос 5
Видев царюющий повеления своя в тебе пренебреженны и увещания презренны, обратися к лукавству, еже ласканием прельстити тя, обещая полцарства тебе дати. Ты же веру сокровищам земным предпочетши и Жениха Христа возлюбивши паче земнаго царства и одежду мученичества паче багряницы, отвергла еси его суесловие. Сего ради восписуем ти сия похвальная:
Радуйся, дево, лесть обличившая;
Pадуйся, запинателя змия поправшая.
Радуйся, дщерь царева;
Pадуйся, дево, рясны златыми одеянная.
Радуйся, всякое вещество превозшедшая;
Pадуйся, на гору боговидения востекшая.
Радуйся, светом богопознания просвещенная;
Pадуйся, труба духа, воспевшая глас истиннаго богословия.
Радуйся, доброе веры исповедание;
Pадуйся, света евангельскаго сияние.
Радуйся, законов вечных хранительнице;
Pадуйся, наша помощнице.
Радуйся, Екатерино, невесто Христова премудрая.

Кондак 6
Проповедником богоносным, апостолом поревновавши, дерзновенно пред лицем мучителя проповедала еси Христа, истиннаго Бога, Емуже в ранах и в темнице пела еси: Аллилуиа.

Икос 6
Возсиявый в сердце твоем свет истиннаго богоразумия отгнал есть мрак скорбей, иже не остави тя алкати, голубицею пищу ти посылая, ниже стужати о болезни, посетил бо Сам тя в темнице, ободряя и многи венцы обещавая. Ты же, терпеливодушная, сим паче укрепилася еси и царицу Августу и воеводу Порфириа, с воины притекших к тебе, обратила еси к свету веры Христовой и научила пети тебе сия:
Радуйся, мироположнице Божественныя любве;
Pадуйся, адаманте крепкий.
Радуйся, вина чудес неизреченных;
Pадуйся, врага терпением убившая.
Радуйся, язвы Господа на теле своем носившая;
Pадуйся, царице Августе с пришедшими к мученическому подвигу путенаставнице.
Радуйся, яко во тьме свет была еси;
Pадуйся, яко Сам Господь, Свет мира, тебе, в темнице бывшей, Себе явил есть.
Радуйся, уз греховных скорая решительнице;
Pадуйся, болезнующих скорая целебнице.
Радуйся, помощнице нашего спасения;
Pадуйся, Екатерино, невесто Христова премудрая.

Кондак 7
Хотящу безбожному царю привести тя к мерзкому идолослужению, паки сети подстилает тебе, премудрая, еже уловити тя лестно похвалою красоты твоея; ты красоту вещь привременну и скоропреходну именовала еси, Христа же исповедала еси Бога жива и истинна и пела ему: Аллилуиа.

Икос 7
Новую показа царь ярость и безчеловечие, повелев епарху колесами растерзати девственное, чистое и святое тело твое, но чудесно рукою ангела абие разрешена была еси безвредна и колеса на части сокрушены, имиже многи от неверных убиены, яко удивися сам царь и предстоящий народ, иже и взываше: «Велик Бог христианский». Мы же, чудящеся сему, взываем тебе:
Радуйся, мученице, ангелом честная и говейная;
Pадуйся, слава полков страдальческих.
Радуйся, светлая на враги победа;
Pадуйся, страх неверных.
Радуйся, сосуде множайшия силы Божия;
Pадуйся, радование верных.
Радуйся, Екатерино, невесто Христова премудрая.

Кондак 8
Странное славы изменение и за Христа страдание царицы и воеводы с воины видевше, устранимся любве мира и плоти и вперим себе к разумению Бога, Сей бо есть красота, и слава, и венец нам, поющим: Аллилуиа.

Икос 8
Весь сладость, весь желание тебе, святая Екатерино, бысть Иисус: сладце бо Его ради горькия муки терпела еси и скипетр, предлагаемый тебе, попрала еси, предзрящи будущее воздаяние. От нас же приими похвальная сия:
Радуйся, чистая, чисте Чистаго возлюбившая;
Pадуйся, горлица, Краснаго Жениха в пустыне дольнаго мира вожделевшая.
Радуйся, воню риз Его благоухавшая;
Pадуйся, яко серна на горах ароматских искавшая Рожденнаго прежде холмов вечных.
Радуйся, подвиг страдальческий ради любве Христовы совершившая;
Pадуйся, лик мученический Богу приведшая.
Радуйся, яко витии тобою получиша Царство Небесное;
Pадуйся, яко тоеже тобою получити чаем.
Радуйся, покров и забрало наше;
Pадуйся, Екатерино, невесто Христова премудрая.

Кондак 9
Все естество ангельское возрадовася радостию, зря тя, Екатерино, победивши миродержца, шествующую к премирным яко победоносную воеводу, в последовании полка страдальческаго, и воспе победная, взывая: Аллилуиа.

Икос 9
Вития многовещанныя заустишася: не возмогше бо противовещати богодухновенным словесем твоим, молчанием почитают дарования твоя; мы же, немощнии, како можем отверсти уста на хвалы твоя? Однако дерзаем и молим, сподоби, благая, безбедно принести тебе песнь сию:
Радуйся, органе Духа Святаго;
Pадуйся, заре неизреченнаго осияния.
Радуйся, догматов Божественных пучина;
Pадуйся, хитросте, препревшая философов.
Радуйся, чаше премудрости;
Pадуйся, плетения витий растерзавшая.
Радуйся, пленицы греховныя разрешающая;
Pадуйся, Екатерино, невесто Христова премудрая.

Кондак 10
Спасти хотящи душу твою, о теле твоем нерадила еси, Екатерино, и на мечное усечение, мучителю давшу на то изречение, ты радостно потекла еси, поющи Святому Безсмертному: Аллилуиа.

Икос 10
Стена тверда и непреодолима явилася еси женам, тебе на место усечения провождающим и с рыданием тя жестокосерду к себе и безразсудну быти именующим: яко не пощадила еси сладкаго живота в цвете юности, яко презрела еси земное предлагаемое царство и блаженство. Ты же воспретила еси неполезный плач их и суесловие, текущи скорейше соединитися чрез смерть со своим Возлюбленным, того ради слышиши:
Радуйся, радостно за Главу Церкве Христа под меч главу свою приклонившая; радуйся, до конца претерпевшая.
Радуйся, течение добре скончавшая;
Pадуйся, яко ни скорбию, ни ранами, ни мечем с пути Христова исповедания не совратилася еси.
Радуйся, яко пламень любве в источнице крове неугасим соблюдшая;
Pадуйся, мучеников красото.
Радуйся, крепкое христиан прибежище;
Pадуйся, Екатерино, невесто Христова премудрая.

Кондак 11
Пение похвальное дерзнухом принести тебе, но оскудевает слово наше и недоумевает ум, како глаголати; обаче слово твое премудрое, многих исхитившее от невежества и идолонечестия, возставляет нас. Даждь нам слово твое, во еже пети удивльшему на тебе величия Своя Богу: Аллилуиа.

Икос 11
Светоприемную тя свещу, мучным усечением погашенную, но на свещнице Небеснем пред Престолом Святыя Троицы поставленную, видевше святии ангели, поклонишася Живущему во веки и, получивше от Владыки повеление, девственное тело твое на горе Синайстей погребоша, да не видимо будет, якоже сама хотела еси, врагом Господним. Мы же песнь сию возсылаем ти:
Радуйся, солнцеобразная дево, на Небеса духом возшедшая;
Pадуйся, Сиона Горняго достигшая.
Радуйся, венче доброты в руце Господни;
Pадуйся, чаше, от обилия дому Божия черплющая радость.
Радуйся, к скинии нерукотворенней, вечней приближившаяся;
Pадуйся, на горе законней почивающая телом.
Радуйся, яко тамо видена быша шествия Бога Синаина, Бога Иаковля;
Pадуйся, места боговидения Моисеова одержание.
Радуйся, ревности Илиины указание;
Pадуйся, купины несгораемой явление.
Радуйся, дево, Деве Царице, в ризы позлащенны одеянной, преиспещренной вследствующая;
Pадуйся, яко тобою Сый воспевается посреде дев тимпанниц.
Радуйся, яко на тебе велелепота Его;
Pадуйся, Престола Вечнаго предстоятельнице.
Радуйся, от храма вселенныя молитвенники к тебе назирающая;
Pадуйся, кадило Вышнему о нас благоприятное.
Радуйся, Екатерино, невесто Христова премудрая.

Кондак 12
Благодать дана тебе от Бога руководствовати к познанию истины Его, в тайне сокровенней, и даяти всем яже к пользе прошения. Темже мя, помраченнии, умиленно просим тя, мудрая дево: просвети умныя наши очи и положи нам к Небеси стезю проходну, да поем с тобою ныне и во вся веки Единому Премудрому: Аллилуиа.

Икос 12
Поюще крепкия твоя мученическия подвиги, хвалим тя, яко одушевленный сосуд спасения человеков: твоим бо разумом Бог премудрость премудрых века сего погуби; тобою витий призва в язык свят, в люди обновления, яко тем страдати за Христа. Просвети и нас, благая дево, помраченных, да зовем ти:
Радуйся, зерцало Божия мудрости;
Pадуйся, силою Вышняго одеянная.
Радуйся, подвижнице, елеем радования умащенная;
Pадуйся, Воеводо, полк Божий к вечному величеству предпославшая.
Радуйся, во светлости святыя вшедшая;
Pадуйся, во свете неприступнем Живущему в лице пламенных слуг представшая.
Радуйся, гром трисвятаго пения гласом своим умножающая;
Pадуйся, неизреченную сладость доброты вкушающая.
Радуйся, яко хвала и радование над главою твоею;
Pадуйся, яко вечная слава тебе объемлет.
Радуйся, от Триипостаснаго Божества венцем Небеснаго Царствия увенчанная;
Pадуйся, благодати и безконечной славы нам ходатаице.
Радуйся, Екатерино, невесто Христова премудрая.

Кондак 13
О святая великомученице Екатерино! Приими сие похвальное пение и избави нас от враг видимых и невидимых и от вечнаго мучения твоим благоприятным ходатайством сохрани, да с тобою присно поем Богу: Аллилуиа.
Этот кондак читается трижды, затем 1-й икос «Ангелом равную...» и 1-й кондак «Избранную и венчанную...».

Молитва святой великомученице Екатерине Александрийской
О святая Екатерино, дево и мученице, истинная Христова невесто! Молим тя чрез особливую благодать, еюже предвари тя Жених твой, Сладчайший Иисус: якоже посрамивши прелести мучителя, мудростию твоею пятдесят витий победила еси и, напоивши их Небесным учением, к свету истинныя веры наставила еси, тако испроси и нам оную Божию мудрость, да и мы, расторгнувше вся козни адскаго мучителя и презрев мира и плоти соблазны, достойны явимся Божественныя славы и к разширению святыя нашея Православныя веры сосуды достойны соделаемся, и с тобою в Небесной скинии Господа и Владыку нашего Иисуса Христа хвалим и прославляем во вся веки. Аминь.

Молитва иная
О святая великомученице Екатерино, избранный чистоты сосуде, столпе Православия, надежная предстательнице наша, явившая нам сама выну умоляти тя, подвижнице законная, святая на святей горе свято почивающая, молим тя: приникни свыше, вонми гласу моления нашего, призри на бедствие рабов твоих, просвети омрачение ума нашего, сотвори нас горняя мудрствовати, а не земная. Поспеши нам молитвами твоими побеждать плотския похотения, пристрастия к миру и козни злых духов, на нас злобно воюющих, да твоим предстательством во дни жития сего свободны будем от враждебных их нападений и по исходе — от воздушных их истязаний. О премудрая дево! Даруй нам вся яже к пользе прошения: Можеши бо многая испросити у Возлюбленнаго Жениха твоего Христа Бога нашего. Вемы, яко много может молитва праведнаго, поспешествуемая благоутробием милосердаго Бога, Емуже слава, честь и благодарение всегда, ныне, и присно, и во веки веков. Аминь.

Тропарь великомученице Екатерине
Тропарь, глас 4:
Добродетельми, яко лучами солнечными, просветила еси неверныя мудрецы, и якоже пресветлая луна ходящим в нощи, неверия тьму отгнала еси, и царицу уверила еси, вкупе же и мучителя обличила еси, богозванная невесто, блаженная Екатерино: желанием востекла еси в небесный чертог, к прекрасному Жениху Христу, и от Него царским венцем венчалася еси: Емуже со Ангелы предстоящи, за ны молися, творяще пречестную память твою.

Кондак, глас 2:
Лик честный Божественне, мучениколюбцы, воздвигните ныне, почитающе всемудрую Екатерину: сия бо в тризнищи Христа проповеда, и змия попра, риторов разумы укротивши.

Ин кондак, глас 3:
Витийствующи днесь, Екатерина мученица и витиям обличи умовредную ересь, ангел бо с Небесе к той прииде, силу от Вышняго принесе, юже приемши, мужески рече: Христос есть мучеником похвала.

Величание
Величаем тя, страстотерпице Христова Екатерино, и чтим честное страдание твое, еже за Христа претерпела еси.

***